Lokasprettur fyrir ACC- og PCC-vottun

Þriðji og síðasti hluti heildarnáms Profectus er að mati flestra nemenda einnig sá lærdómsríkasti. Það er persónulegur mentor-hluti þar sem hver nemandi vinnur í nánu samstarfi með sínum mentor að lokaundirbúningi fyrir ACC og PCC-vottun sem veitir nemendum nafnbótina „ICF- vottaður markþjálfi“.

Nemendur sem hafa lokið grunn- og framhaldsnámi Profectus munu eftir þennan lokahluta verða færir um að standast PCC-færnimat. Á mannamáli þýðir það að þeir geti sýnt fram á í verki (með hljóðupptöku) að sú markþjálfafærni sem þeir hafa náð að tileinka sér ( í grunn- og framhaldsnáminu og með þeirri reynslu sem þeir hafa öðlast við að markþjálfa á námstímanum) standist þær kröfur sem ICF ætlast til af PCC-vottuðum markþjálfa (e. Professional Certified Coach).

Hvað er innifalið í lokaundirbúningi fyrir vottun?

Þrír persónulegir mentortímar með kennara.
2 x 3 klst. hóp-mentortímar með kennara.
Undirbúningstími fyrir hvernig best er að undirbúa sig fyrir ICF-vottun.
Yfirferð á upptöku með skriflegri endurgjöf út frá PCC-færniviðmiðum.
Yfirferð á lokaupptöku með skriflegri endurgjöf sem mentor fer yfir með nemanda.

Þeir nemendur sem hafa lokið við og staðist LEVEL 2-vottað nám geta notað það útskriftarskírteini til að sækja um bæði ACC-vottun (þegar þeir hafa markþjálfað 100 klst.) og einnig PCC-vottun (þegar þeir hafa markþjálfað 500 klst.) án þess að bæta við sig frekara markþjálfanámi í millitíðinni.

Hvernig fer lokahluti námsins fram?

Mentor hluti heildarnámsins hefst formlega eftir fyrstu lotu grunnnámsins, heldur áfram um miðbik framhaldsnámsins og lýkur í þessum hluta. Við mælum með að nemendur fari af stað í þriðja hlutann þegar þeir hafa markþjálfað u.þ.b. 70-80 klst. Nemandi ræður sjálfur hvort hann tekur lokahlutann að framhaldsnámi loknu eða samhliða framhaldsnáminu ef hann sér fram á að ljúka tilskildum fjölda markþjálfunartíma á námstímanum.

Í upphafi lokahlutans eru þrír hóp-mentor tímar.
Eftir þá sendir hver og einn nemandi inn hljóðupptöku af heilu markþjálfasamtali (40 mín.) sem metið er af viðurkenndum ICF-matsaðila Profectus.
Í framhaldinu fær nemandi senda ítarlega skriflega endurgjöf sem hann nýtir til að þekkja betur styrkleika sína og hvernig hann getur nýtt þá til að vinna markvisst í að efla færni sína í þeim þáttum sem þarfnast meiri athygli.
Nemandi mætir í einkatíma með sínum mentor þar sem þeir vinna að sameiningu að því að efla færni nemandans og ákveða í sameiningu næstu skref.

Þessu ferli sem lýst er hér að ofan er svo endurtekið áður en nemandi sendir inn loka hljóðupptöku til PCC-færnimats sem kennarinn í náminu – sem einnig er ICF-viðurkenndur prófdómari – metur út frá 37 mismunandi færniþáttum. Hingað til hafa 87% nemenda staðist PCC-matið í fyrstu atrennu – en þeir sem ekki standast í fyrstu atrennu fá fjórar vikur til að undirbúa sig betur og reyna aftur.

Hver er munurinn á LEVEL 1-vottuðu og LEVEL 2-vottuðu námi?

LEVEL 1-vottað nám miðast við að undirbúa nemendur fyrir fyrsta stig vottunar frá ICF – ACC-vottun.
LEVEL 2-vottað nám miðar að því að undirbúa nemendur fyrir bæði fyrsta og annað stig vottunar - ACC og PCC-vottun.

Þeir nemendur sem hafa lokið við og staðist LEVEL 2-vottað nám Profectus geta notað það útskriftarskírteini til að sækja um bæði ACC-vottun (þegar þeir hafa markþjálfað 100 klst.) og einnig PCC-vottun (þegar þeir hafa markþjálfað 500 klst.) án þess að bæta við sig frekara námi í millitíðinni.

Við hjá Profectus tókum rökstudda ákvörðun um að bjóða ekki upp á LEVEL 1-vvottað heldur eingöngu LEVEL 2-vottað nám og að baki þeirri ákvörðun liggja nokkrar ástæður.

Kröfur ICF til LEVEL 1 fræðsluaðila.

Ein af aðal ástæðum fyrir því að við ákváðum að bjóða ekki upp á LEVEL 1-vottað nám eru þær kröfur sem ICF hóf að gera til fræðsluaðila á því vottunarstigi þegar ICF kynnti það fyrst til sögunnar árið 2023. Við teljum ekki tímabært fyrir nemendur í markþjálfun að fara í gegnum það ítarlega mentor-ferli að loknu grunnnámi sem fræðsluaðilum sem bjóða upp á LEVEL 1-vottað nám hafa skuldbundið sig til að fara með alla sína nemendur í gegnum.

Fræðsluaðili sem býður upp á LEVEL 1-vottað nám:

Ber að vakta fimm markþjálfasamtöl frá upphafi til enda hjá hverjum nemanda.
Gefa þeim skriflega endurgjöf fyrir að minnsta kosti þrjú af þessum fimm samtölum.
Fyrir útskrift ber þeim að meta innsenda prófupptöku nemenda út frá öllum ACC-færniviðmiðunum.
Gefa þeim ítarlega skriflega endurgjöf sem endurspeglar frammistöðu nemandans út frá öllum ACC-færniviðmiðunum.
Gefa þeim ítarlega skriflega endurgjöf sem endurspeglar frammistöðu nemandans út frá öllum ACC-færniviðmiðunum.
Allir nemendur eiga að hafa fengið 10 mentortíma. Sjö af þeim mega vera með hóp en þrír verða að vera persónulegir einkatímar með kennara eða mentor sem hefur uppyllir skilyrði ICF.

Fræðsluaðilar sem auglýsa LEVEL1-vottað nám en framfylgja ekki öllum þessum skilyrðum hér að ofan er með öllu óheimilt að útskrifa nemendur með LEVEL 1 merkinu frá ICF á útskriftarskírteinum þeirra - sem er forsenda þess að nemendum sé heimilt að hefja ACC-LEVEL 1 vottunarferlið hjá ICF.

Kröfur ICF til LEVEL 2 fræðsluaðila.

Profectus er fræðsluaðili sem býður upp á LEVEL 2-vottað nám.

Það nám samanstendur af þremur hlutum: grunn- og framhaldsnámi auk þess hluta sem hér er lýst og við framfylgjum öllum þeim kvöfum sem ICF gerir til LEVEL 2-vottaðs náms:

Við vöktum sex markþjálfasamtöl hjá hverjum nemanda.
Gefum þeim skriflega endurgjöf fyrir að minnsta kosti fjögur af þessum sex samtölum.
Einnig metum við lokaupptöku nemenda en við gerum það við lok framhaldsnámsins, út frá PCC-færniviðmiðunum.
Gefum þeim ítarlega skriflega endurgjöf sem endurspeglar það mat.
Allir nemendur hafa fengið 10 mentortíma. Sjö af þeim eru hóp-mentor tímar en þrír eru persónulegir einkatímar með kennara eða mentor sem uppyllir skilyrði ICF.

Reynslan hefur kennt okkur að ávinningur nemenda er mun meiri þegar vöktuðum samtölum er dreift jafnt og þétt yfir námstímann.

Í grunnnáminu senda nemendur inn eina hljóðupptöku af markþjálfasamtali sem við metum út frá ACC-færniviðmiðum og sendum þeim skriflega endurgjöf á.
Í framhaldsnáminu senda nemendur inn aðra hljóðupptöku af markþjálfasamtali sem við metum út frá PCC-færniviðmiðum og fá nemendur skriflega endurgjöf á hana út frá öllum PCC-færniviðmiðunum.
Í þessum hluta - lokaundirbúningi fyrir vottun förum við yfir restina af þeim vöktuðu samtölum sem ICF gerir kröfu um.

Það er mat nemenda okkar sem hafa klárað mentor-ferlið í lok námsins - eins og hér er gert - að þar liggi bæði dýrmætasti, og dýpsti lærdómurinn því þá hafa þeir hafa öðlast mun dýpri skilning á sjálfum sér og öllum hæfnisþáttum markþjálfans.

Upplýsingar, þekking og færni

Í dag er aðgengi að upplýsingum meira en nokkru sinni fyrr—þær eru alstaðar og oft yfirþyrmandi. En sá sem býr bara yfir upplýsingum hefur enn ekki öðlast þekkingu. Það er ekki fyrr en viðkomandi er fær um að tengja saman upplýsingar með þeim hætti að öðlist nýja sýn eða aðra eða dýpri merkingu að hægt sé að tala um að viðkomandi hafi öðlast þekkingu.

Þekking ein og sér er hins vegar ekki til margra hluta gagnleg ef viðkomandi er ekki fær um að beita henni sér eða öðrum til framdráttar eða vaxtar. Þegar viðkomandi hefur lært að beita þekkingu sinni með áhrifaríkum og uppbyggjandi hætti er fyrst hægt að tala um að hann búi yfir raunverulegri færni.

Hér erum við að lýsa ferðalagi nemenda í Level 2-vottuðu námi.

Við höfum verið í stöðugri endurskoðun og þróun á markþjálfanáminu okkar í átta ár. Við höfum alltaf tekið endurgjöfum nemenda okkar með opnum huga og á hverju ári höfum við gert breytingar á náminu—gerð það örlítið betra. Markmið okkar í náminu er að kenna nemendum okkar eins mikið og mögulegt er á þeim tíma sem við höfum saman.

Í fyrsta hluta námsins „Grunnnáminu – Gerðu gott betra!“ er athygli okkar að langmestu leyti á því að miðla þekkingu til nemenda og þær æfingar sem nemendur fara í gegnum eru til þess fallnar að þeir upplifi á eigin skinni áhrifamátt þeirrar þekkingar.
Í öðrum hluta námsins „Framhaldsnáminu – Upp og áfram!“ einbeitum við okkur að því að umbreyta þekkingu í raunverulega færni. Það er að nemandinn öðlist hæfni sem er áþreifanleg, framkvæmanleg og hann geti nýtt af sjálfsöryggi. Við hjálpum nemendum vissulega að styrkja þekkingargrunn sinn – en megináherslan í öðrum hlutanum er á að efla færni nemenda. Reynslan hefur kennt okkur að nemendur verða að leyfa tímanum að vinna með sér í þeirri vinnu sem er ástæðan fyrir því að sá hluti spannar ellefu mánuði.
Lokahluti námsins „Endasprettinum að ACC- og PCC-vottun“ tekur tillit til þess að nemendur eru eins misjafnir og þeir eru margir. Í þeim hluta vinnum við með á persónulegum nótum með hverjum og einum þar sem við gjágreinum færni hans – í hvaða PCC-færniþáttum viðkomandi er sterkastur og hvaða þáttum hann verður að sýna meiri athygli til að standast PCC-lokamatið.

Eftir átta ára þróunarvinnu teljum við okkur vera komin með úthugsaða og sérsniðna uppbyggingu og nálgun á hvern hluta námsins. Sú þróunarvinna mun færa nemendum okkar bæði fullnægjandi þekkingu og færni sem skilar þeim sjálfstrausti í hlutverki markþjálfa þegar þeir útskrifast frá okkur sem öflugir PCC-vottaðir markþjálfar sem munu gera heiminn örlítið betri - með einu markþjálfasamtali í einu.