Viðurkenndur fyrirtækja - og breytingamarkþjálfi

Dags-og tímasetningar:

Framhaldsnámið hefst 30. ágúst og lýkur 30. nóvember.

Kennt er á Hótel Kríunesi við Elliðavatn.

1. Undirbúningstími fyrir námið er þriðjudaginn 27. ágúst frá kl. 17:00 - 19:00 (fjarfundur á ZOOM).
2. Fyrsta lotan (3 dagar) verður kennd frá 30. ágúst til 1. september frá 8:30-16:30 á hótel Kríunesi við Elliðavatn.
3. Önnur lotan (3 dagar) verður kennd frá 11. október til 13. október frá 8:30-16:30 á hótel Kríunesi við Elliðavatn.
4. Þriðja lotan (2 dagar) verður kennd frá 29. nóvember til 30. nóvember frá 8:30-16:30 á hótel Kríunesi við Elliðavatn.

Á milli lotna fá nemendur 10 mentortíma frá kennurum í náminu.

Sérstaða námsins

Sérstaða námsins liggur meðal annars í því að kennslufræðileg nálgun á rætur sínar að rekja til félagsvísinda. Í náminu fara nemendur í bæði persónulega og krefjandi vegferð þar sem þeir öðlast djúpan sjálfsskilning og um leið víðtækari skilning á mannlegu eðli. Sú nálgun hefur sýnt og sannað að í rekstrarumhverfi nútímans eru lykilforsendur árangurs verulega frábrugðnar þeim þjálfunaraðferðum sem lengi voru taldar hinar einu sönnu.Þær áherslubreytingar, uppbygging og kennslufræðileg nálgun sem hefur verið innleidd í þetta nýja framhaldsnám hafa reynst bæði stjórnendum og öðru starfsfólki mun betur í starfi, hvort sem litið er til framlegðar, skilvirkni, starfsmannaveltu, tíðni mistaka eða niðurstöðutalna. Þegar öllu er á botninn hvolft liggja verðmæti námsins meðal annars í því að nemendur læra af hverju úreltir stjórnunarhættir íhaldssemi standa í vegi fyrir persónulegum og faglegum árangri.

Mikil áhersla lögð á að nemendur leggi sig fram við að innleiða þá reynslu og þekkingu sem þeir öðlast samhliða náminu. Námið er fjölbreytt og vinnuframlag nemenda felst bæði viðveru í staðarlotum, fjarkennslu, lestri, hópavinnu og verkefnavinnu á milli lota.

Hvað er LEVEL 2 vottun frá ICF?

Level 2 vottað nám er „Allt innifalið“ markþjálfanám, það er að segja það inniheldur allt sem ICF gerir kröfu um fyrir vottun. Helsti munurinn á Level 1 vottuðu námi og LEVEL 2 vottuðu námi er að þeir fræðsluaðilar sem hafa uppfyllt ströng skilyrði LEVEL 2 vottunar, hafa einnig heimild til að meta og votta færni nemenda sinna við námslok í framhaldsnáminu miðað við PCC-færni hafi nemandi tekið bæði grunn-og framhaldsnám hjá Profectus. Standist nemendur það mat þá er það fullnægjandi undirbúningur fyrir umsókn, bæði fyrir ACC-vottun og PCC-vottun hjá ICF, allt eftir því hversu mikla reynslu (fjöldi klst. í markþjálfun) nemandi hefur öðlast.

Margir sem koma í námið eru enn að undirbúa sig fyrir ACC-vottun sem er fyrsta vottunarstig alþjóðlegrar vottunar frá ICF. Námið er frábær leið til að ljúka því vottunarstigi. ekki að bæta við sig frekara námi til að mega sækja um næsta vottunarstig (PCC) þegar að því kemur. Þeir nemendur sem læra og útskrifast hjá Profectus geta því látið meta PCC færni sína á íslensku og fá niðurstöður innan nokkurra daga í stað þess að þurfa að taka upp og senda hljóðupptökur af markþjálfasamtölum sínum á ensku til ICF í Bandaríkjunum, ásamt handritum af þeim upptökum til mats og yfirferðar og þurfa að bíða í allt að þrjá mánuði eftir niðurstöðum.

Nánari lýsing á náminu

Lota 1 - Dagur 1

Fyrsti dagurinn í náminu snýr að því að dýpka skilning þátttakenda á færniviðmiðum PCC-markþjálfans og því viðhorfi sem þeir vilja tileinka sér í náminu til að hámarka eigin árangur.

Eftir daginn hafa nemendur fengið svör við eftirfarandi spurningum:

• Hver er munurinn á ACC-færni og PCC-færni markþjálfa?
• Hvaða áherslumunur er á verklagi ACC- og PCC-markþjálfa?
• Af hverju eru siðareglur ICF sá hornsteinn sem störf markþjálfa hvíla á og hvernig endurspeglast þær í markþjálfun innan fyrirtækja?
• Hvenær verðum við fullorðin og hvernig tengist það starfi markþjálfa?
• Hverjar eru helstu eftirsjár fólks og af hverju skiptir það máli?

Lota 1 - Dagur 2

Á öðrum degi er lögð áhersla á að skapa sálfræðilega öruggt umhverfi sem er lykilforsenda áskorandi markþjálfunar. Farið er í FACTS þjálfunarlíkanið þar sem sýnt er fram á hvernig áskorun og stuðningur verða að haldast í hendur ásamt mikilvægi þess að líta ávallt á mistök sem tækifæri til vaxtar.

Eftir daginn hafa nemendur fengið svör við eftirfarandi spurningum:

• Hvað er „sálrænt öryggi“ og af hverju er það forsenda árangurs í markþjálfun?
• Hvað er „áskorandi markþjálfun“ (e. Challenging Coaching), hver er ávinningur hennar?
• Undir hvaða kringumstæðum þjónar það hagsmunum markþegans að markþjálfi sé áskorandi? (Yerked Dodson kúrfan og Flow líkanið)
• Hvernig nýtir markþjálfinn endurgjöf af alúðarfestu?
• Hver eru hin þrjú stig ábyrgðar markþega í fyrirtækjaumhverfi?
• Af hverju er mikilvægt fyrir markþjálfa að undirbúa sig fyrir ZOUD? (e. The Zone of Uncomfortable Debate)

Lota 1 - Dagur 3

Á þriðja degi námssin er áhersla lögð á að losna frá vanabundnu þjálfunarmynstri og tileinka sér aðrar aðferðir sem efla vitund markþjálfans. Kynntar eru fjölbreyttar leiðir sem gagnast nemendum við að auka fjölbreytileika þeirrar þjónustu sem þeir veita. Einnig kynnast nemendur hvernig þeir geta nýtt ýmis greiningartól til að kanna raunstöðu einstaklinga og teyma innan fyrirtækja með það að leiðarljósi að aðgreina orsök og afleiðingu.

Eftir daginn hafa nemendur fengið svör við eftirfarandi spurningum:

• Hvernig geta markþjálfar notað fleiri og áhrifaríkari leiðir til vitundarsköpunar?
• Hver er ávinningurinn með því að nýta ýmis greiningartól og tæki við að kanna raunstöðu hjá einstaklingum og teymum áður en hafist er handa?
• Hvaða greiningartól getur markþjálfi notað, af hverju á að nýta þau og undir hvaða kringumstæðum gagnast þau best?
• Hvaða verkefni bíða nemenda áður en þeir mæta í næstu lotu?

Á milli fyrstu og annarrar lotu:

Á milli fyrstu og annarrar lotu skuldbinda nemendur sig til að innleiða þá nýju þekkingu sem þeir taka með sér úr fyrstu lotunni. Nemendur vinna markvisst að eigin markmiðum og einnig í hópum á milli lota til að auka líkurnar á því að hámarka árangur og persónulegan vöxt á meðan náminu stendur.

Strax eftir fyrstu lotuna hefst mentor-markþjálfun þar sem nemendur senda kennurum hljóðupptökur og vinna náið með þeim við að dýpka sjálfsþekkingu sína og færni ásamt því að kortleggja sína leið að PCC-færnimatinu sem á sér stað í lok námsins.

Lota 2 - Dagur 4

Fjórði dagurinn í náminu er tileinkaður meðvirkni og meðvirkni á vinnustað, í hverju orsakir hennar liggja og með hvaða hætti hún tengist framkomu okkar og hegðun. Þessi dagur – að öllum öðrum dögum ólöstuðum – hefur haft djúpstæð áhrif á nemendur þar sem þeir átta sig á því hversu mikill skaðvaldur meðvirknin er og hversu mikilvægt það er fyrir markþjálfa að vera meðvitaðir um birtingamyndir hennar.

Eftir daginn hafa nemendur fengið svör við eftirfarandi spurningum:

• Hverjar eru birtingamyndir meðvirkni og hvaða áhrif getur hún haft á einstaklinga og sambönd.
• Hvernig birtist meðvirkni á vinnustað?
• Af hverju er meðvirkni ein af aðalástæðunum fyrir kulnun í starfi?
• Hvernig er hægt að nýta mátt spurninga til að hjálpa markþegum að horfast í augu við eigin meðvirkni og styðja þá við að þróa heilbrigðari tengsl?
• Hvernig getur markþjálfinn borið kennsl á merki um meðvirkni, bæði hjá sjálfum sér og markþegum sínum?

Lota 2 - Dagur 5

Fimmta daginn í náminu læra nemendur að beita 360°-hugsun. Hún opnar á víðtækara hugarfar markþjálfans, ekki einvörðungu í starfi sínu heldur einnig í daglegu lífi. 360°-nálgun gengur út á að þekkja sjálfan sig og læra að bera ótakmarkaða virðingu fyrir sérstöðu annara. Hæfnisþættir markþjálfans eru skoðaðir út frá 360°-hugmyndafræðinni sem dýpkar verulega skilning nemenda á þeirri dýpt sem þar er að finna.

Eftir daginn hafa nemendur fengið svör við eftirfarandi spurningum:

• Hvað er 360°-hugsun og hvernig gagnast hún markþjálfanum í sínu starfi.
• Hverjar eru hinar átta víddir 360°-hugsunar.
• Hvernig eykur 360°-hugsun tilfinningagreind markþjálfans?
• Hvernig geta bæði markþjálfar og stjórnendur nýtt 360°-hugsun við „ör-þjálfun“?
• Hvernig er hægt að nýta 360°-hugsun til að auka skilvirkni og árangur?
• Hvernig er hægt að nýta 360°-hugmyndafræðina við að leysa úr ágreiningi, setja sér markmið og við ákvarðanatöku?

Lota 2 - Dagur 6

Fimmti dagurinn í náminu er helgaður tilfinningagreind og mikilvægi hennar í hlutverki markþjálfans. Fyrir þennan dag hafa nemendur tekið EQi-2.0 tilfinningargreindar greiningu og fá niðurstöður sínar afhentar í byrjun dags. Fáir gera sér grein fyrir hversu afgerandi áhrif tilfinningagreind hefur á færni og vitund markþjálfans og því leggjum við ríka áherslu á að nemendur læri að þekkja eigin styrkleika og takmarkanir í öllum fimm lykilþáttum tilfinningagreindarinnar og undirflokkum þeirra: sjálfsbirtingu, sjálfstjáningu, félagsfærni, ákvarðanatöku og streitustjórnun.

Eftir daginn hafa nemendur fengið svör við eftirfarandi spurningum:

• Af hverju er tilfinningagreind mikilvægari en vitsmunagreind í starfi markþjálfans?
• Hvernig hjálpar tilfinningagreind fólki að velja sér jákvætt viðbragð við neikvæðu áreiti?
• Hver er birtingamynd hugsunar og þar af leiðandi hegðunar hjá þeim sem hafa sterka eða veika sjálfsskynjun (sjálfsvirðingu, sjálfsbirtingu og tilfinningavitund)?
• Hver er birtingamynd hugsunar og hegðunar hjá þeim sem hafa eða skortir færni í sjálfstjáningu (tilfinningalegri tjáningu, staðfestu og sjálfsstæði)?
• Hver er birtingamynd hugsunar og hegðunar hjá þeim sem búa yfir eða skortir félagsfærni (samkennd, samfélagslegri ábyrgð og samskiptafærni)?
• Hver er birtingamynd hugsunar og hegðunar hjá þeim sem hafa eða skortir færni til ákvarðanatöku (Raunveruleikatengingu, stjórn á hvatvísi og lausnaleit)?
• Hver er birtingamynd hugsunar og hjá þeim sem hafa eða skortir getu til streitustjórnunar (sveigjanleika, streituþol og jákvæðni)?
• Hvernig tengjast þessir þættir innbyrðis og hvernig er markvisst hægt efla tilfinningalega færni?

Á milli annarrar og þriðju lotu:

Eftir aðra lotuna vinna nemendur verkefni sem snýr að því að skilgreina sjálfa sig í hlutverki markþjálfa, hvernig markþjálfar þeir vilja vera, hvaða þjónustu þeir munu bjóða, hver markhópur þeirra er og hvernig þeir munu markaðssetja sig að námi loknu – burtséð frá því hvort þeir starfi innan fyrirtækja eða ætli sér að vera sjálfstætt starfandi. Nemendur fá nánari útlistun á lokaverkefninu í lok annarrar lotu. Þó svo um persónulegt lokaverkefni sé að ræða mælum við með því að nemendur haldi áfram að vinna í hópum á milli lotu tvö og þrjú þar sem þeir geta sótt sér stuðning og hvatningu.

Mentor-markþjálfun með kennurum heldur áfram samhliða lokaverkefninu þar sem nemendur fá aðstoð svo þeir geti tekið flugið að námi loknu.

Lota 3 - Dagur 7

Á þessum næstsíðasta degi í náminu er farið í breytingastjórnun og hvernig markþjálfun getur nýst til að auka verulega líkurnar á árangri á öllum stigum hennar. Til þess þurfa nemendur að þekkja ferli breytingastjórnunar allt frá því að viðhorf nauðsynjar er framkallað að innleiðingu breytinga svo þær verði hluti af menningu fyrirtækisins. Mikilvægt er að nemendur mæti vel undirbúnir og séu búnir að kynna sér vel hin átta skref í breytingarlíkani Kotters því dagurinn gengur ekki út á að kenna breytingastjórnun. Deginum er varið í að flétta saman með áhrifaríkum hætti hlutverki markþjálfans, meðvirkni, 360°-hugsun og tilfinningagreind og hvernig sú óhefðbundna nálgun nýtist í hverju skrefi breytingastjórnunar. Þannig geta markþjálfar hjálpað öllum þátttakendum í breytingaferli að sjá, skilja og taka meðvitaðri ábyrgð á hlutverki sínu með ávinning heildarinnar að leiðarljósi.

Eftir daginn hafa nemendur fengið svör við eftirfarandi spurningum:

• Af hverju er svo mikil skörun á milli markþjálfunar, breytingastjórnunar, Design thinking og Google-sprint?
• Hvernig nýtist það markþjálfa að þekkja öll skrefin í breytingarstjórnunarlíkani Kotters?
• Af hverju er mikilvægt að kynda undir viðhorfi nauðsynjar í upphafi markþjálfunarsambands og hvernig tengist það áskorandi markþjálfun og ZOUD? (e. The Zone of Unconfortable Debate)
• Hvaða tilgangi þjónar þverfaglegt forystuteymi og hvernig tengist það persónulegri markþjálfun?
• Hvernig tengist þriðja skref Kotters, „Að móta skýra framtíðarsýn“ ábyrgðarhlutverki markþjálfans og mikilvægi vitundasköpunar?
• Hvernig getur markþjálfi tekist á við sinnuleysi og varnarstöðu starfsmanna?
• Hvað einkennir þroskaferli teyma og af hverju er mikilvægt fyrir markþjálfa innan fyrirtækja að þekkja vísbendingar ósjálfbærra eða óheilbrigðra teyma?
• Hvernig geta markþjálfar hvatt markþegum sína til aðgerða með því að skilgreina, undirbúa og fagna áfangasigrum?
• Hvernig er hægt að nýta meðbyr árangurs til endurskilgreiningar á frekari árangri og hvernig tengist það meðvirkni og tilfinningagreind markþega?
• Hvernig getur markþjálfi hjálpað markþegum að festa jákvæðar breytingar í sessi þannig að þeir detti ekki í sama farið á ný?
• Hvernig er hægt að nýta PAMF-hringrásina til að viðhalda árangri og stuðla að stöðugum framförum?
• Hvað getum við lært af TOYOTA?

Lota 3 - Dagur 8

Á þessum síðasta degi námsins er byrjað á því að líta um öxl og skoða hvernig allt námið er samofið hlutverki markþjálfans. Á meðan náminu stendur getur verið erfitt að sjá skóginn fyrir trjám. Hver dagur í náminu ber nemendum nýja þekkingu sem dýpkar stöðugt skilning þeirra á hinum víðtæka áhrifamætti markþjálfunar. Því er mikilvægt að taka þyrlusýn á hvernig öll sú nýja þekking er samofin og órjúfanlegur hluti vaxtar og árangurs. Að lokum eru nemendur kynntir fyrir fleiri leiðum í markþjálfun sem þeir geta lært og tileinkað sér að námi loknu. Það er rík ástæða fyrir því að það er ekki gert fyrr í náminu því það er ekki fyrr en á þessum tímapunkti að nemendur eru undir það búnir að skoða til dæmis: umbreytandi markþjálfun (e. Transformational Coaching) eða sögumarkþjálfun (e. Narrative Coaching þar sem þær leiðir krefjast mun meiri færni og þekkingar en kennd er í grunnnámi í markþjálfun.

Eftir daginn hafa nemendur fengið svör við eftirfarandi spurningum:

• Hvernig tengjast allir dagarnir í náminu órjúfanlegum böndum?
• Hver er munurinn á hefðbundinni markþjálfun (e. Cognitive Coaching), umbreytandi markþjálfun og sögumarkþjálfun?
• Hvernig er að vera útskrifaður markþjálfi úr framhaldsnámi Profectus vitandi að það er ekkert sem stendur í vegi fyrir því hverju nemendur geta áorkað nema þeir sjálfir?

Eftirspurn eftir markþjálfum er að aukast

Eftirspurn eftir markþjálfum hefur verið að aukast bæði á einstaklings- og fyrirtækjamarkaði. Fyrirtæki eru að kalla eftir teymisþjálfun í mun meira mæli og rannsóknir hafa einnig varpað ljósi á að þeir sem kaupa þjónustu markþjálfa vilja gjarna meiri áskoranir og festu. Við vitum að framhaldsnámið hjá okkur standist fyllilega allar kröfur og væntingar, bæði markaðarins og nemenda.

Námið er krefjandi ferðalag þar sem stöðugt er unnið að framförum og aukinni sjálfsþekkingu nemenda. Í framhaldsnáminu er nemendum skipt upp í nokkur teymi og kynnast þar með á eigin skinni út á hvað teymisþjálfun gengur. Teymisvinnan tryggir nemendum einnig stuðning samnemenda á meðan náminu stendur, aðhald til að halda sér við efnið og tækifæri til að efla þrautseigju sína jafnt og þétt. Það eru takmörk fyrir því hversu mikið er hægt að kenna á 121 klukkustundum en með góðum kennurum, frábærum nemendum, fullkomnu kennslu- og stuðningskerfi á vefnum og brennandi ástríðu fyrir faginu læra nemendur yfirleitt alltaf meira en væntingar þeirra voru í upphafi náms.